ALUA PASAMBAHAN ADAT MINANGKABAU

SAMBAH UNTUK MAKAN

Sungguahpun Datuak nan taimbau, tagah dek imbau nan sakali, dek alua pidoman adat, batindiek adat kasamonyo, dek warih cupak jo gantang, dek alua Datuak kasamonyo, tumbuah sarupo iko kini. hutang dek diri sipangkalan, dek karakok nan bajunjuangan. kok untuak alah batariak, baban lah nyato dibaonyo, jikok  saloroang tantang itu, nan bak pitua Datuak juo, adat limbago dilawekkan, pakai pidoman jurumudi, nan tau di pasang turun naiek.

juoaro nan tau di ereng gendeng, tahu di garak dengan gariek, tahu di ombak nan mangguluang, iolah badai rang namokan, adat limbago dalam jamu, bapakai bujang lah balangan, lah tampak piriang dengan cawan, barisi nasi dengan aie, babuni tadanga di padapuran, kok nasi jo aie lah batatiang, lah tahedang di muko Datuak, kamuko alek nan basamo, hanyo baato hanyo lai, nan jadi pintak pinto kami, kok nasi mintak di makan, aie mintak di minum, basuah tangan dek kito, sakian sambah pado Datuak.